Wall Street Journal : “Amerîka di navbeyna Tirkiye û PKKê de navçîtî bike!”
Rojnameya Amerikî Wall Street Journal di weşana xwe ya îroyîn de li ser çarseriya “Pirsgirêka Kurd” de pêşniyazeke wisa kir: “Tirkiye û PKK jibo çarseriyê amade ne. Lê pirsiyar gelek komplîke ye, jiber vê yekê pêwîstiya Tirkan û Kurdan bi alîkariyeke ji derve heye. Di vê derbarê de serokê Yekîtiya Dewletên Amerîka dikare dewreke mezin bilîze. Bo nimûne ew dikare Tirk û Kurdan bihîne gel hev û di çarseriyê de dewra xwe bilîze. Her wiha PKK dikare çekên xwe teslîmî Amerîkayê bike û Amerîka jî dikare serkirdeyên PKKê li hin cîhên cûr be cûr belav bike. Bi vî aweyî ev pirsgirêka girîng û mezin dikare çarser bibe.”
Di nivîseke îroyîn ya di vê rojnameya Amerîkî Wall Street Journal bi sernivîsa “Di Aşîtiya Tirk û Kurd de şansekî” de pêşniyazeke ber bi çav ya di navbeyna Tirk û Kurdan de dihête kirin û ji serokê Amerîkayê Barack Obama dihê kirin ku bila ew di navbeyna Tirk û Kurdan de navçîtî bike û bi vî aweyî dewra xwe ya dîrokî bilîze.
Rojname bi vê pêşniyazê ve dide destnîşankirin ku Obama bi vê navçîtiyê ve hem dikare şansekî mezin yê aşîtiya Tirk û Kurdan de bi başî bikar bihîne û hem jî dikare dewra xwe li ser cîhana Îslam de mezintir û bi hêztir bike.
Her wiha rojname jibo vê pêşniyazê jî vê argûmanê pêş dixîne: “PKK di şerê xwe yê bi salan de di navbera Tirkiyê û Amerîkayê de birînên mezin vekirin û jiber vê yekê jî pir astengî avabûn. Her çi qas mûtefîkeke bingehî bibe jî gelek caran di navbeyna Tirkiyê û Amerîkayê de aloziyên mezin rûdan. Bi navçîtiya Barack Obama hem aşîtiyeke di navbeyna Tirk û Kurdan de çêdibe, meseleya Kurd hel dibe û hem jî têkeliyên Tirkiyê û Amerîkayê jî dikeve rewşa berê ya baş û rêkûpêkî.”
Rojname di pêşniyaza xwe de cîh dide vê nihêrînê jî: “Di başûr û bakûrê Kurdistanê de herêmeke mûsaît ya berhemdananiya (endûstriya) xurt heye, eger ev aşîtî bihête pêkanîn, wê çaxê Tirkiyê dikare vê bazar û potensiyala endûstrî ya mezin bikar bihîne. Ev yek hem jibo pêşeroja Tirkiyê û hem jî jibo herêmê (Kurdistanê) encamên baş û bikêr bide afirandin.”
Yekemîn car e ku ji Amerîkayê pêşniyazeke wisa vekirî û heyînî hatiye kirin. Niha dihête çaverê kirin ku Tirkiye û PKKê çi bersivê bidin jibo vê pêşniyazê?
Kurdistan news net
23/06/2009